🖼 #کپیر_ائولی_لر؛ وصف حال اهالی روستای ورجوی از زبان استاد سخن، فیلسوف و شاعر معاصر افتخار ایران زمین استاد #حیدر_عباسی_ورجوی

 🔸انسانین حیاتیندا هردن بیر ائله حادثه اوز وئریر کی آدامین بوتون وارلیغینی آلقیش و یا نیفرتله دولدورور. روحدا بیر اوقدر درین سیلین مه ین ایز بوراخیر کی هئچ بیر قدرت و هئچ بیر یاغیش اونون اثرینی یویوب آرادان آپارا بیلمز. تکجه ییرتیجی آدام جیلدینه گیرمیش قودوزلار، بو حادثه لرله اوزله شنده، اوزلرینه توز دا قوندارمازلار.

🔸 نه آلینلارینا اوتانماق تری اَیله شر و نه ده گوزلری یاشارار. بو حادثه لرین بیر اوجوندا قَرن لَر قوروموش آرزیلارین شووکه لری چیچکله نَنده ، اوبیری باشیندا دا، نیفرت دالغالاری، دال بادال قامچی یئتیریلمیش کیشنه ین آت کیمی آغیزی کوپوکله یر. بیر جه اوندادیر کی قوندارما تمدّنلرین یاراتدیغی یارامازلیقلار و اونلارین داشلارینی دوشلرینه ویرانلار، آغیرلیقلارینی، بویوک لوکلرینی اودوزارلار.

🔸 اوقدر کیچیلیب اسگیک اولارلار کی اونلارین آدلارینی چکمک ده اوره کلری بولاندیران اولار. بِللّه نر کی او تمدنلرین جارچیلاری، انسان آدینا کساد بازارلارینی قیزدیرسالار دا، یوزه یوز یالنیش گئدیب و اونون ایسته دیکلریندن یوز ایللر اوزاقلاشیبلار و انسان قارشی سیندا سنگر و سیلاح دوزه لتمه یه باشلاییبلار.

🔸 سوز آچدیغیم بو حادثه ده اونلاردان بیریسیدیر. ائله کی اومولماز، آرابیر گوز ووران ایشیق سیز بیر اولدوزو گونشدن پارلاق گورسه دیر. ایستر- ایسته مز آدام اوتاندیغیندان باشینی یئره تیکیر و بوینونا آلیر کی دویون منیم باخیشیمدا و گوزلویومده ایمیش. یوخسا گونش او اولدوزا بیر موشتولوق دا اولانمازایمیش.

🔸 بو ایشلری، تب چئویر، آغیر یونگول ائله یندن سونرادیر کی ده یه نه یین اوبیری باشی بونجا دار گوزلولویو  یارادانلارا ساری چئوریلیر. دیش دیشه قیسیلیر، گوزلردن نیفرت پوسگورور و بوتون ده یرلرین آغ بوزونا باخمادان، قاباغینا گله نی کسیر بیچیر؛ آمما اوره ک یئنه ده سویوماق تانیماییر.

🌹___مراغانین__وه‌رؤوی___کندیء____🌹

🔶  مراغانین یاخینلیغیندا و‌ه‌رؤوی آدلی بیر کند وار کی یازیدا یارامازلیقلا « #ورجوی » یازیلار. بو کندین ائولری نین چوخو کپیر داشینداد تیکیلیبدیر. وه‌رؤویده یاشایانلار، دانیشاندا جمله لرین آخیرینی بیر آز چکیب اوزالدارلار. بو ته‌هر دانیشماق، دیلچی چی لیک باخیمیندان، آز ائولی یئرلرین دانیشیقلاریندان بیر نشانه دیر و دیله بیر اؤزغونلوق و ایستی لیک باغیشلایاندیر.

🔶  بو کندیدن آداملاری ان قدیملردن، خان حققینی و جریمه نی آغرینا-آغرینا وئررمیشلر. ائله کی یوبانیلمیش آدی حقدن اؤترو طؤوله یه سالی نیب و بیر باغلی چوبوق (چیرپی) دا اونلارین کوره کلرینی کوپوشگه دیب، بیز زول گون چیخارتدی، بیر نفر آغ ساققالین آراچی لیغی ایله چوبوقچونون اَل آغریما پولوندان سونرا، بیر قویون یا شیشَک ده اوسته لیک، اونو طؤوله دن قورتارار میشلار.

💢 بیر گون آتام طالیب آدلی بیر کیشیدن سوروشور:
🔶 « منی بیر باشا سال گؤروم، بو کندین اهالیسی کؤته یی و جریمه نی ساتین آلمامیشدان واخلی-واختیندا، اؤز بورجلارینی وئرمه یه نییه آغرینیرلار؟»

💢 طالیب جاوابیندا دئییر:
🔶 « سَن هانکی حاخدان و بورجدان دانیشیرسان، بو کندین اهالیسی هئچ زامان اؤلرینی خانلارا بورجلو تانیماییرلار. قوردون اوزونه هیریلداماق قویونلاریء گوزدن یایینیرماقدی »

🔶 طالیبین دئدی یینه گؤره بیر گون اونون آتاسی دؤیولوب سؤیولَندَن سونرا، ائوینه دؤنور و ایکی رکعت نامازدان سونرا زول-زول قانچیل اولموش کوره یینی قاوزاییب آللاها دئییر:
💢 « سن اوزون تایق اول کی من بیر داها کونوللو قودوز خانا باش أیمه دیم، قوللاریمی باغلایاندان سونرا أمه ییمی تالادیلار. کوره ییمده کی بو یازیلار شاهید اولسونلار. »

🔶 طالیب سؤزونون دالیسینی بئله توتور:
💢 بیر گیله، بیر زینگیرته اوزومو، اربابلارا کؤنوللو وئرمک، دؤیوشده بوتون کندی تالاماقلا بیردی. آتالاریمیز بو دَبلره و بدعتلره بویون قویسایدیلار، بو اَئلدن دیشقار ایش اییرنج لی یینی اَلدن وِئریب و اوشاقلاریمیزین بویونلاریندان گؤزنظر دوواسی کیمی آسیلی قالاردی. بئله لیکله قولوموز آچیلیب، یوردوموز باسقیندان قورتولان گون، عومور بویو نسیلدن نسیله آغرینی جانیمیزلا آلماغیمیزا، قودوزلارا کؤنوللو هن دئمه مه یی میزه، قیز قالاسی کیمی آلینماز اولدوغوموزا، توی بایرام ائله مه لی ییک. بئله لیکله جانی میز اینجی نیب، مالی میز گئتسه ده، یاخشی بیلیریک کی گلن گونلریمیز بیزلری دیشله مه یه جک.

🖼 « بیزیم چیی کَرپیشده گله جه یی آینا کیمی دورو گؤره‌ن آتالاریمیز، خانلارا کؤنوللو کَرپیش کس سه ایدیلر، بیزلر ده او بینانین پَرده سینی یونوب هئیزانینی آتاردیق. »

🔶 بو سؤزلری ائشیدنده، توکلریم بیز-بیز دورور. اؤز - اؤزومدن سوروشورام:
💢 « #هانکی اَل بونلارا دوشوندوروبدور کی اسارت تکجه سینماقدا دَئییل، بلکه سینماغی بویونا آلماق و اونا سینیش مَکدیر. اسارت قولو باغلی لیق یوخ، بلکه نوخداسیز ظالیمین دالی سیجا سورونمکدی. #هانکی بیر فیلسوف بو هیس ویرمیش دووارلارین ایچینده، بو درینلیکده بونلارا فلسفه درسینی وئریبدیر؟ »

💢 « #عاشورالارین فلسفه سینی بونلارا کیم آنلادیبدیر؟ #تولستوی لارین، #گاندی لرین منفی مبارزه سینی بونلارا کیم دوشوندوروبدور؟ #حسینین بو عظمتده سوزونو کی:

✋🏿 « من دیریلیی ظالیم لرله اسگیک لیکدن سووای آیری بیر زاد گورمه ییرم »، کیم آچیقلاییبدیر؟ بو سورقولارا، آیدین بیر جاواب تاپانماسام دا، ایچی بوش تمدّونو ساواد و ده‌یر آدلاندیریب، یئرسیز-ندنسیز ساواشی نسخه یازانلار و بو کپیر ائولرده یاشییانلاری دایاز و ساوادسیز دوشوننلره نیفرتی مین قیلینجی گونو گوندن کسگین اولور.

🔶 بو حادثه نین قیراغیندا او دانشگاه اوستادی نین آغیز دولوسو اوروپالیلار حاققیندا بوی بویلاماسی دا یادیما دوشور:
💢 لندن ده بیر گون بیر قانجیق ایتین خییاواندا دوغماسینا گوره نئچه ساحات یول باغلاییر و سیگنال ویرماق یاساق اعلام اولونور، ائله کی بیر نئچه نفر پرستار او دوغان ایتی آمبولانسینان خسته خانایا گوتورورلر؛ یاساق سینیر و ایشلر اؤز حالینا قاییدیر.

✍️ ایندی تندیرلردن اود قاپمیش آلاولی نفسیمله نعره تپیرم:
✋🏿 سیز ای ایچگینه هوروب یابانجی یا قویروق بولایانلار و هر یئرده آش اولاندا او یئرده قاش اولوب هامیدان باش اولانلار، آداملیقدان، تمدّندن، اؤزگه لرین اللری ایله اوتدورولان کره لردن، و سیزلرده توره نن چیخارلاردان، ده‌وه‌لر یوکو آددان-ساندان، هانکی بیریسی ائلییه بیلر، بو #کپیر_داشدان_دوزه_لمیش_ائولرده_یاشایانلارین (اهالی روستای وه‌رؤوی) باسمالیقلاریندا دؤرد آشیق آتانلاری نین کسینتی دیرناغینا بیر بالاجا موشتولوق اولسون.

✋🏿 سیز ای بومبالاری نین سسی میلیونلار بویلو آروادی، آیی، گونو یئتیشمه میش دوغوزدوران  آمما بیر بویلو قانجیق ایته گوز یاشیندان شربت چکن لر، ای ویتنامین گویه رنتی لرینه ده رحم ائله مه ین آدامزادلار، سیزین کی تمدّونوزون بیر باشی آیا دایانیر و بیر باشی دا اقیانوسلارین درین لییی نی آراشدیریر، بو تاپدانمیش ائولرده یاشایانلارین اوره یی نین و دوشونجه سی نین بؤیوکلویونده تارازییا قویماغا نه یی نیز وار ؟

🔶 سیناق ایچون بیر لحظه ده اولموش اولسا، دارگوزلولوک گوزلویونو گوزلری نیزدن چیخاردین. آینالاردا داشا دؤندویونوزو، قارقین ماغی نیزی گورون، انسانلارین هارای سَسی سیزلره لای لای دئییر.
✋🏿 سیزین ثانیه نین میلیوندان بیرینی سئچن آلَتلَرین هانکی ائلییه بیلر بو آجلیق قوینوندا دَملَنمیش انسانلارین !!! ، گوز یاشیندان دورو و سحر شئهیندن تمیز اوره کلری نین دنیزینه جوما بیلسین.⁉️

💢 بو آشقارسیزلارین نه گووه نمه یه اوچاق کارخانالاری و نه ده اوزاق-اوزاق فضالاری ایاقدان سالماغا سفینه لری و نه ده واهمه یوکلو طیّاره لری واردیر. بو کندین ( وَه‌ر ؤوینین) بوتون وار-یوخونو قیرانا چکسَن، ایکی نفر اَزیلگن، هئدیکله نن خان اوغلونون بیر ایلده زای ائله دییی پولونان برابر اولا بیزملز.

💢 بونلارین بؤیوکلویو و چاتیشمازلیغی تکجه بیر سؤزده دیر کی بوتون دنیا یازیچی لارنین دا بویونلارینداکی داغدان آغیر یوک ائله او سوزو قانادلاندیریب یئر اوزونه یایماقدادیر و او سوز بودور:

🖼 « بیز بو #کپیردن دوزه لن داریچقال ائولری میزدن، آیری اؤلکه لرین حقّی تالانمیشلاری ایله  بیرلیکده، هارای تَپیریک:
#بیزلر_هئچ_کیمه، #هئچ_دؤولته، #هئچ_قدرته_و_اربابا و دووارچی لارا باش أیمه ییریک. بیزلر گؤیو تانی ییریق بیر ده قوربانلیق اتی کیمی پای پولوشک اولمامیش یئری. »

دیاریم بو عالم شاهیمدیر تاری
داها بیلمیرم بوندان آرتیق واری

🖼 بیز بوتون فاکولته لر یوروب دانشگاهلار گؤره نلردن ایسته ییریک کی بیزیم چارپاناق اللریمیز و گون قووورموش اوزلریمیز اوره کلرینی بیزدن اوشوتمه سین؛

✋🏿 #آمما شیرین چؤره یی آغزیلاردا چکیره اودونا دؤنده رن لرین و تمدّن آدی ایله جهنم قاپیسینی اوزلره آچان #هیروشیما یارادانلارین و اونلارین جووید کینلی اوره کلری اوره کلرینی بولاندیرسین.
✋🏿 #سولانمیش_نفرت_قیلینجلاری_میز ، #دیبده_دووار_مینن_لری_آتدان_سالاجاقدیر.

✍️ دارتیلمامیش دنلر؛ حیدر عباسی ورجوی؛ 1384